Mae’r gong yn offeryn hynafol a sanctaidd sydd wedi cael ei ddefnyddio ers canrifoedd yn y Dwyrain i iachau. Mae ganddo siap cylch, ac mae wedi ei wneud o fetalau gwahanol. Mae’n perthyn i deulu’r ‘ideophone’ – sy’n golygu ei fod yn cynhyrchu ei swn ei hun drwy ddirgrynu. Wrth iddo gael ei darro â maled mae’r metal yn atseinio ac yn creu haenau o seiniau dwfn, cyfoethog sy’n adeiladu’n raddol. Gellir teimlo’r rhain drwy’r corff yn ogystal â’u clywed. Ystyrir y gong yn un o’r offerynnau iacháu drwy sain mwyaf pwerus.

Myfyrdod y corff – cyfle i baratoi’r corff i dderbyn y sain. Trwy dalu sylw i wahanol rannau’r corff yn eu tro mae’r meddwl yn cael cyfle i ymuno a bod yn bresenol gyda’r corff. Cyflwyno sain – clychau tingsha a cwpanau canu. Trochfa gong – cyfle i ymdrochi yn nirgryniadau’r gong. Offerynnau daearu – cyfle i ddychwelyd yn ôl yn addfwyn at eich corff ac i’r presennol. Deffro a daearu – myfyrdod y corff i ddeffro’r synhwyrau ac i ddaearu ymhellach.

Mae mynychu trochfa gong yn hynod adferol ac mae’n ffordd wych o gefnogi ein llesiant corfforol ac emosiynol. Er fod profiad pawb yn unigryw, mae llawer yn profi: • Ymlacio dwfn, llonyddwch a thawelwch • Llai o straen, y system nerfol yn tawelu • Gwell cwsg • Clirdeb meddyliol • Rhyddhad emosiynol • Tensiwn corfforol yn rhyddhau - ysgafnder • Teimlo cysylltiad dwfn â rhywbeth mwy na chi eich hunain • Ymdeimlad o fywiogrwydd ac egni newydd   Weithiau gall synau a dirgryniadau’r gong deimlo’n ddwys neu’n heriol. Mae hyn yn rhan naturiol o broses y corff o ryddhau, clirio ac o ail- gydbwyso. Mae emosiwn cryf a trawma yn cael ei storio yn y corff - yn ei’n cyhyrau, fascia a hyd yn oed yn ein celloedd. Mae dirgryniadau’r gong yn dod o hyd i’r egni dwys yma sy’n gaeth yn y corff ac yn dechrau ei wthio i’r wyneb yn barod i’w ryddhau. Mae hyn yn berffaith naturiol ac mae synau’r gong yna i gefnogi’r broses yma. Os yw’r profiad yn ystod y sesiwn gong yn un heriol, mae croeso i chi ddod i gael sgwrs gyda mi ar y diwedd. Rwyf hefyd yn argymell yfed digon o ddẃr, ac os yw’n teimlo’n iawn, ystyried sesiwn gong bersonol fel y gall y broses o glirio barhau mewn ffordd dyner a diogel.

Mae sain yn teithio drwy aer, solidau a dŵr. Gan fod ein cyrff ni wedi eu gwneud yn bennaf o ddŵr (o leiaf 70%) mae’n gyfrwng gwych i gario sain! Wrth i donnau sain deithio drwy’r corff, mae’r dirgryniadau yn ysgogi ein cylchrediad, yn tylino’r system nerfol- gan annog stad o ymlacio dwfn. Nid y gongiau’n unig sy’n dirgrynu-mae popeth yn dirgrynu, gan gynnwys y corff. Pan mae’r corff yn iach mae cydbwysedd a chytgord, ond pan mae’r corff allan o diwn, rydym yn profi salwch neu haint. Pan gaiff y gongiau eu chwarae’n reddfol ac yn sensitif - gall synau’r gong helpu’r corff i ail diwnio, i ddod yn ôl at iechyd a chydbwysedd- yn gorfforol a meddyliol. Mae ymchwil wedi profi fod synau a dirgryniadau cyfoethog a chymhleth y gong yn cael effaith sydyn iawn ar yr ymennydd gan ostwng ein tonnau ymenyddol o Beta (effro) i Alpha (ymlacio) i Theta (gorffwys) ac yn olaf i Delta (myfyrdod dwfn). Pan mae’r meddwl yn y stad yma, mae’r corff yn adnewyddu, yn trwsio ac yn gwella. Wrth i gyfradd curiad y galon a’r system anadlu arafu, mae’r corff yn rhyddhau mwy o gemegion megis endorffin a dopamin i’r gwaed ac mae’r rhain yn gysylltiedig â meddwl clir a theimlo’n dda.

Mae trochfa gong yn hynod gefnogol ac yn ddiogel i’r mwyafrif ohonom, ond mae yna ambell eithriad lle nad ydynt yn addas. Os yw un o’r canlynol yn berthnasol i chi, byddwn yn eich argymell i gysylltu gyda’ch meddyg cyn mynychu. • Beichiogrwydd – yn ystod y tri mis cyntaf a/neu os oes cymhlethdod gyda’r beichiogrwydd (risg uchel). Cysylltwch gyda mi ymlaen llaw. • Epilepsi – Sy’n cael ei ysgogi gan sain neu os nad yw dan reolaeth. • Cyflyrau calon difrifol neu unigolion gyda ‘pacemaker’ • Heriau iechyd meddwl difrifol nad ydynt wedi’u rheoli ar hyn o bryd • Llawdriniaeth ddiweddar neu anaf i’r pen – cysylltwch gyda mi ymlaen llaw Os oes ganddoch waith metel yn y corff - plât, sgriw, pin, gall dirgryniadau’r gong weithiau deimlo’n gryfach. Mae croeso ichi roi cynnig ar y sesiwn a gweld sut mae eich corff yn ymateb. Os oes gennych unrhyw amheuon neu gwestiynau, mae croeso i chi gysylltu.

Mae’r sesiynau gong cymunedol yn addas ar gyfer unigolion sydd dros 16 oed. Os ydych o dan 18 oed, dylech wirio gyda rhiant neu warchgeidwad cyn archebu. Gall sesiynau un-i-un, dau-i-un neu sesiynau preifat gael eu teilwra ar gyfer gwahanol oedrannau. Mae croeso i chi gysylltu i drafod opsiynau.